गोकुल बाँस्कोटा भ्रष्टाचार प्रकरण : सांसद पाठक र आले पनि संलग्न रहेको आरोप




काठमाडौं, फागुन १२
करोडौंको कमिसन काण्डमा निवर्तमान संचारमन्त्री गोकुलप्रसाद बाँस्कोटासहित नेकपाका सांसद डा. सूर्य पाठक र प्रेम आलेको नाम सार्वजनिक भएको छ । पाठक संसदको सार्वजनिक लेखा समितिका सदस्य पनि हुन् ।

बाँस्कोटाको भ्रष्टाचार प्रकरणको अडियो सार्वजनिक गरेका विजयप्रकाश मिश्रले पाठक र आलेपनि भ्रष्टाचार काण्डमा संलग्न रहेको खुलाएका हुन् । मिश्रले नेपाली रेडियो नेटवर्कसँगको अन्तर्वार्ताका क्रममा नेकपाका सांसदद्धय डा. पाठक र आलेको संलग्नता प्रत्यक्ष रुपमा रहेको खुलासा गरेका हुुन् ।

उनका अनुुसार लेखा समितिमा सबै काम मिलाइदिने जिम्मेवारी डा.पाठकले लिएका थिए । उनले डा.पाठक र आलेमाथि छानविन हुनुपर्ने माग गरेका छन् । मिश्रको यो आरोपमा सत्यता रहेको लेखा समितिका काँग्रेससम्बद्ध सदस्यहरुको पनि सहमति रहेको छ ।

मिश्रले उक्त अडियो सार्वजनिक गरेकै दिन डा.पाठककै जोडबलमा उक्त लेखा समितिको बैठक बोलाइएको थियो । त्यस बैठकमा पनि उनले मिश्रको बारेमा निकै चासो लिएका थिए । उनले ती मिश्रलाई तत्कालै पक्राउ गरी कारबाही गर्न भन्दै प्रहरीलाई पत्राचार गर्न समितिका सभापति र सचिवलाई दबाब दिएका थिए ।

अर्कातर्फ डा. पाठकको सम्पर्कबाटै ती मिश्रलाई लेखा समितिमा विज्ञ बनाएर ल्याइएको थियो । मिश्रलाई डा।पाठकले नै पूर्व सञ्चारमन्त्री गोकुल बाँस्कोटा समक्ष पुर्याएको बताइन्छ ।

शुरुदेखि नै यिनीहरुले सबै प्रोजेक्टहरु मिलेर गर्ने भनी काम गर्दै आएकोमा कमिसन नमिलेपछि यी दुई बीच पनि मनमुटाव भएको बुझिएको छ । विजय मिश्रले सांसद पाठकसँग जापानको पिआर रहेको आरोप अन्तर्वार्ताका क्रममा लगाएका छन् ।

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2022 Deshko News