कोरोना संक्रमणबाट मृत्यु हुनेको संख्या १०० नाघ्यो
काठमाडौं, साउन ३१
कोरोना भाइरस संक्रमणबाट नेपालमा मृत्यु हुनेको संख्या १ सय नाघेको छ ।
पछिल्लो २४ घण्टामा धनुषाको जनकनन्दनी गाउँपालिका वडा नम्बर ४ का ५० बर्षीय पुरुषको मृत्यु भएसंगै मृतकको संख्या १ सय नाघेको हो । श्वास प्रश्वासमा समस्या भएपछि उनलाई बिहीबार प्रादेशिक अस्पताल, जनकपुरधाम ल्याइएको थियो । उपचार हुन नसकेपछि काठमाडौं रिफर गरिएका उनको बाटोमै मृत्यु भएको हो ।
मृत्युपछि स्वाब संकलन गरेर परीक्षण गर्दा शुक्रबार कोरोना संक्रमण पुष्टि भएको रिपोर्ट आएको प्रदेशको सामाजिक विकास मन्त्रालयका वरिष्ठ प्रशासक विजय झाले जानकारी दिए ।
यस्तै कोशी अस्पताल, बिराटनगरमा उपचाररत मोरङ र सिराहाका एकएक जनाको मृत्यु भएको छ । मोरङको विराटनगर महानगपालिका–१३ का ३० वर्षीय पुरुषको बिहीबार मृत्यु भएको हो ।
सिराहाको बिष्णुपुर गाउँपालिका–१ का ४० वर्षीय पुरुषको पनि कोशीमै उपचारको क्रममा मृत्यु भएको छ । नेपालमा पहिलो कोरोना संक्रमित ९ माघमा भेटिएको थियो ।
प्रकाशित मिति: ३१ श्रावण २०७७, शनिबार
