नक्कली कम्पनी खडा गरी विदेशी नागरिकबाट करोडौँ ठगी, ६ जनामाथि अनुसन्धान



काठमाडौं, पाैष २४
एक समूहले नक्कली कम्पनी खडा गरी शङ्कास्पद कारोबारमार्फत विदेशी नागरिकबाट लाखौँ डलर र करोडौँ रुपैयाँ ठगी गरेको प्रहरीको अनुसन्धानमा खुलेको छ।

उनीहरुले कारोबार गर्ने अनुमतिप्राप्त नभएको कम्पनी खडा गरेर त्यसमार्फत विदेशी नागरिकलाई ठगी गरेको पाइएको प्रहरीको केन्द्रीय अनुसन्धान ब्युरो (सीआईबी) ले जनाएको छ। उक्त आर्थिक अपराधमा संलग्न रहेको आरोपमा अछाम बन्नीगढी गाउँपालिका–६ घर भई काठमाडौँ बस्ने ३५ वर्षीय पृथ्वीबहादुर शाहसहितका ६ व्यक्तिलाई प्रहरीले पक्राउ गरेको छ।

उक्त ठगीकार्यमा सोही जिल्लाका २५ वर्षीय विजयविक्रम शाह, जाजरकोट घर भई काठमाडौँ बस्ने २७ वर्षीय चक्रबहादुर खत्री, दोलखा खोपाचाङ्गुका ४४ वर्षीय अनुप खड्का, नवलपरासी (पश्चिम) बर्दघाटका ४० वर्षीय रूकमाङ्गत काफ्ले र अछाम घर भई काठमाडौँको चन्द्रागिरि नगरपालिका–५ बस्ने २७ वर्षीय रङ्बहादुर साउद संलग्न रहेको पाइएको ब्युरोका प्रहरी उपरीक्षक सञ्जयसिंह थापाले जानकारी दिए। उनका अनुसार उनीहरुलाई नियन्त्रणमा लिई अदातबाट म्याद थप गरेर अनुसन्धान थालिएको छ।

सुरुमा सीआईबीले कम्पनी रजिस्ट्रारको कार्यालय त्रिपुरेश्वरमा दर्ता रहेको हन्टिङ रिजर्भ अफ नेपाल प्रालिलगायत दर्जनौँ कम्पनीका नाममा शङ्कास्पद कारोबार देखिएको भन्ने सूचना प्राप्त गरेको थियो। सोही सूचनाका आधारमा अनुसन्धानका लागि खटिएको सीआईबीको टोलीले ती व्यक्तिले नक्कली कम्पनी खडा गरेर गैरकानुनी रूपमा आर्थिक कारोबार गर्ने गरेको पत्ता लगाएको हो।

उनीहरुमाथिको अनुसन्धानका क्रममा कारोबार गर्ने अनुमतिप्राप्त नभएको कम्पनी सञ्चालन गरी आर्थिक कारोबार गरेको, कम्पनीको उद्देश्यभन्दा फरक प्रकृतिका कार्यहरू गरेको, एक अमेरिकी नागरिक जुलियाको कम्प्युटरमा पहुँच पुर्‍याई एन्टिभाइरस नवीकरणबापतको रकम पठाउनु भनी विश्वास दिलाएर खाताबाट अमेरिकी डलर ट्रान्सफर गर्न लगाएको पाइएको उनले बताए।

‘अन्य विदेशी नागरिकलाई समेत झुक्याई, विश्वासमा पारी बेइमानीपूर्वक वायरस्क्याम गरी स्वीफ्टमार्फत करिब ४६ लाख ४६ हजार ७३७ अमेरिकी डलर, रु तीन करोड २२ लाख रकम ठगी गरेको प्रारम्भिक अनुसन्धानमा खुल्न आएको छ’, उनले भने।

उनीहरुले गैरकानुनी तवरले आर्थिक लाभ प्राप्त गर्ने उद्देश्यले ठगी गरी प्राप्त गरेको रकम उनीहरूले सञ्चालन गरेका विभिन्न कम्पनी तथा व्यक्तिका बैंक खातामा जम्मा गर्ने गरेका र प्राप्त रकमको स्रोत लुकाउने उद्देश्यले अन्य विभिन्न व्यक्ति तथा संस्थाको खातामा रकम पठाई ठगी गरेको पाइएको छ। उनीहरुबारे थप अनुसन्धान जारी रहेको ब्युरोले जनाएको छ। रासस

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
सिधा सम्पर्क : ९८५२०५२२००
           
संस्थापक / प्रधान सम्पादक : ध्रुव सुबेदी
     
           
facebook
© 2023 Deshko News