धनगढीको एक खाद्य गोदाममा आगलागी

धनगढी, वैशाख ३१ । कैलालीको धनगढीस्थित एक खाद्य गोदाममा आगलागी भएको छ । शनिबार राति धनगढी उपमहानगरपालिका वडा नम्बर ४ उत्तरबेहडीस्थित कृष्णदत्त पाण्डेले सञ्चालन गरेको पिपि ट्रेडर्सको गोदाममा आगलागी भएको हो ।

आगलागीबाट गोदाममा रहेका चामल, भुजा, खाने तेल, फ्रुटी, चिउरा, चाउचाउलगायतका खाद्य सामान र गोदाम पूर्ण रुपम नष्ट भएको छ । आगलागीबाट झन्डै ६ करोडको क्षति भएको कैलाली प्रहरीले जनाएको छ ।

धनगढी उपमहानगरपालिकाको दमकल नेपाल प्रहरी, सशस्त्र प्रहरी र स्थानीयको सहयोगमा आगो नियन्त्रणमा लिइएको थियो । जिल्ला प्रहरी कार्यालय कैलालीका अनुसार स्टोरमा विद्युतको तार सर्ट भएर आगलागी भएको खुलेको छ ।