सर्पको टोकाइबाट दाजुभाइको मृत्यु
सिन्धुली, जेठ १६ । विषालु सर्पको टोकाइबाट सिन्धुलीको दुधौली नगरपालिका १ भलुवाहीमा दाजुभाइको मृत्यु भएको छ । स्थानीय गणेश पहाडीका छोराहरू १२ वर्षीय गृष पहाडी र ७ वर्षीय कृष पहाडीको मृत्यु भएको हो ।
सोमबार राति सँगै सुतेका छोराहरू मंगलबार बिहान बेहोस अवस्थामा फेला परेपछि तत्काल स्थानीय स्वास्थ्य चौकी लगिएकोमा उपचार हुन नसकेपछि महोत्तरीको गौरवासमा रहेको सर्पदंश उपचार केन्द्र लगिएको थियो ।
स्थानीयका अनुसार सर्पदंश केन्द्रले समेत रिफर गरेपछि जनकपुर लगिएकोमा त्यहाँको अस्पतालले दाजुभाइको नै मृत्यु भएको घोषणा गरेको थियो ।
सिन्धुली प्रहरीले घटनाको अनुसन्धानका लागि प्रहरी टोली त्यसतर्फ खटिएको जानकारी दिएको छ ।
प्रकाशित मिति: १६ जेष्ठ २०८०, मंगलबार
