गगनलाई देउवाको जवाफ : अब सभापति बन्ने पालो युवाकै हो

काठमाडौं, जेठ २० । नेपाली कांग्रेसका सभापति शेरबहादुर देउवाले कुनै व्यक्तिको विरोध गरेर पार्टी बलियो नबन्ने बताएका छन् । शनिबार नेपाली काँग्रेस जिल्ला कार्य समिति ललितपुरको प्रथम जिल्ला सम्मेलन कार्यक्रममा महामन्त्री गगन थापाप्रति लक्षित गर्दै उनले यस्तो बताएका हुन् ।

आफू सभापतिमा रहेर काम गर्ने कार्यकाल यो नै अन्तिम रहेको भन्दै देउवाले अब पार्टी चलाउने जिम्मेवारी युवा पुस्ताकै रहेको बताए । उनले पार्टीको लागि काम गरेर पार्टीलाई बलियो बनाउन कसैले पनि नरोकेको स्पष्ट पारे ।

आफूले कांग्रेसलाई देशकै ठूलो पार्टी बनाएको भन्दै उनले भने, ‘सानो पार्टी ठूलो पार्टी भएको छ । अब यसलाई अघि बढाउनुछ । अझ यसलाई बलियो बनाउनुछ । गाली गरेर केही हुनेवाला छैन । काम गर्नुस् न पार्टी ठुलो बनाउनुस्, बलियो बनाउनुस् ।’