मकवानपुर, असार १० । मकवानपुरको राक्सिराङ गाउँपालिकाले गाउँपालिकाभित्र बसाइँसरी आउनेलाई आगामी वर्षबाट घर उपहार दिने भएको छ ।

गाउँपालिकाका अध्यक्ष राजकुमार मल्लले गाउँसभामा प्रस्तुत गरेको नीति तथा कार्यक्रममा यस्तो कार्यक्रम राखेको जानकारी दिए । उनका अनुसार गाउँपालिकाले दुर्गम भेगबाट बसाइँ सरेर सुगम भेगतर्फ जाने प्रवृत्तिलाई निरुत्साहित गर्ने उद्देश्यले अन्यत्रबाट बसाइँ सरेर आउनेलाई घर उपहार दिने योजना बनाएको हो ।

‘अन्यत्रबाट गाउँपालिकाभित्र बसाइँ सरी आउनेतर्फ आकर्षित गर्न गाउँपाकिलाले ‘सुन्दर समाज हाम्रो सार, बसाइँ सरी आउनेलाई घर उपहार’ कार्यक्रम सञ्चालन गर्नेछ ।

घर कस्तो प्रकारको हुने र कति लागतको हुने भन्ने कुरा गाउँपालिकाले बनाउने कार्यविधिमा निर्भर हुनेछ । समुदायमा आधारित समूको दिगो व्यवस्थापनमा एक घर एक धारा कार्यक्रमलाई थप बस्तीमा विस्तार गरिने पनि नीति तथा कार्यक्रममा उल्लेख छ ।

गाउँपालिकाको बजारोन्मुख बस्ती पलाँसे चैनपुर, राक्सिराङ, अठारे, चौकीटार र सिलिङ्गेमा व्यवस्थित बस्ती विकास र नक्सापाससहितको पक्की भवन निर्माण गर्न सहरी विकास तथा एकीकृत बस्ती विकास मापदण्ड कार्यान्वयन गरिने नीति पनि गाउँपालिकाले लिएको छ ।

प्रकाशित मिति: १० असार २०८०, आइतबार