काठमाडौं, असोज १ । राप्रपा नेपालले आगामी असोज ३ गते देशब्यापी प्रदर्शन गर्ने भएको छ । असाेज ३ गते संविधान दिवस पर्छ ।

आज पार्टी अध्यक्ष कमल थापाको उपस्थितिमा बसेको समिक्षा बैठकले गणतन्त्र, धर्मनिरपेक्षता र संघीयता बोकेको भ्रष्ट शासकको पुत्ला जलाउन तथा राँके जुलुश प्रर्दशन गर्ने निर्णय गरेको हो ।

प्रदर्शनका लागि पार्टीले जिल्ला कमिटी, भातृसंगठन र आमजनतालाई आह्वान समेत गरेको महामन्त्री राजाराम बर्तौलाले जानकारी दिए ।

बैठकलाई सम्बोधन गर्दै अध्यक्ष थापाले संघीय गणतन्त्रको नाममा मुलुकलाई संकटको दलदलमा फसाएकोले मुक्तिका लागि अब सडक संघर्ष आवश्यक भएको बताए ।

बैठकमा पार्टीका पदाधिकारी सदस्य तथा जनवर्गीय संगठनका प्रमुखहरु र उपत्यकाका जिल्ला अध्यक्षहरुले पनि आन्दोलनमा जान जोड दिएका थिए ।

प्रकाशित मिति: १ आश्विन २०८०, सोमबार