राउटेका महामुखिया महिनबहादुर शाहीको निधन

काठमाडौं,१९ कार्तिक । राउटे समुदायका महामुखिया महिनबहादुर शाहीको निधन भएको छ ।

दैलेखको गुराँस गाउँपालिकाले प्रदान गरेको परिचय पत्रमा ९ भदौ २०१४ जन्ममिति भएका शाहीको आज बिहान ६६ वर्षको उमेरमा निधन भएको हो ।

शाहीको राउटे परम्परा अनुसार अन्तिम दाहसंस्कारसमेत गरिएको छ । महामुखिया शाहीकी पत्नी दुनी शाही र दुई बुहारीहरू सुरमान र सुन्दरी शाही रहेका छन् ।

महामुखिया शाहीका छोरा नारायण शाहीको केही समयअघि आगोमा जलेर निधन भएको थियो ।

फिरन्ते जीवनयापन गर्दै आएका उनीहरूको हाल भैरवी गाउँपालिका–३ छामघाट खोला नजिकै बसोबास छ । उनीहरू पाँच दिन अघिमात्रै बसाइ सरेका थिए ।

राउटे समूदायमा कुनै एक व्यक्तिको निधन भएमा हाल बसिरहेको ठाउँ छोड्ने प्रचलन रहि आएको छ ।