स्कुल बसको ठक्करबाट साइकल यात्रीको मृत्यु

मोरङ । स्कुल बसले ठक्कर दिँदा मोरङमा साइकल यात्रीको मृत्यु भएको छ ।

विद्यार्थी लिनलाई विराटनगरबाट आमबारीतर्फ जाँदै गरेको को १ क १७०० नम्बरको बसले रंगेली नगरपालिका–२ चेका पुलमा साइकलयात्रीलाई ठक्कर दिएको हो ।

विराटनगरस्थित अरनिको स्कुलको बसले ठक्कर दिँदा साइकलमा यात्रा गरिरहेका जगन्नाथ ठाकुरको मृत्यु भएको जिल्ला प्रहरी कार्यालय मोरङले जनाएको छ ।

गम्भीर घाइते भएका उनलाई उपचारका लागि रंगेली अस्पताल पुर्‍याउनसाथ चिकित्सकले मृत घोषित गरेका थिए ।

शवलाई पोस्टमार्टमका लागि रंगेली अस्पतालमै राखिएको छ।

बस र चालक झापाको कन्काई नगरपालिका–१ का ५७ वर्षीय इन्द्रप्रसाद मिश्रलाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ ।