काठमाडौं महानगरभित्रका विद्यालयका रङ एकैप्रकारको हुने


 


काठमाडौं महानगरपालिकाले नगरभित्रका सामुदायिक विद्यालयको रङ एकै प्रकारको गर्ने तयारी गरेको छ । महानगरपालिकाका प्रमुख विद्यासुन्दर शाक्यले आफ्नो क्षेत्रभित्र रहेका सामुदायिक विद्यालयका भवनमा एकरूपता ल्याउन एकै किसिमको रङ प्रयोग गर्ने जानकारी गराएका छन् ।

महानगरपालिकाभित्र पदस्थापन भएका माध्यमिक विद्यालय तहका स्थायी शिक्षकको शपथग्रहण कार्यक्रममा मेयर शाक्यले नगरभित्रका विद्यालयको आफ्नै पहिचान बनाउन एकै किसिमको रङ प्रयोग गर्ने बताएका हुन् ।

‘काठमाडौं महानगरपालिका क्षेत्रभित्रका विद्यालयको शैक्षिक गुणस्तर मात्र होइन, भौतिक संरचनामा पनि सकेसम्म एकरूपता ल्याउने प्रयासमा लागेका छौँ,’ मेयर शाक्यले भने, ‘त्यसका लागि महानगरपालिका क्षेत्रभित्र रहेका सबै विद्यालय भवनमा एकै खालको रङरोगन गर्ने तयारी थालेका छौँ ।’ महानगरमा ९१ वटा सामुदायिक विद्यालय रहेका छन् ।

उनले त्यसको सम्पूर्ण खर्च महानगरपालिकाले व्यहोर्नका लागि करिब १० करोड रकम विनियोजन गरिएकोसमेत जानकारी गराए । मेयर शाक्यका अनुसार विद्यालयको रङरोगन गर्ने, खेलमैदान निर्माण गर्ने, वृक्षरोपण गर्ने, शौचालय र खानेपानीको व्यवस्था गर्नेलगायतका शीर्षकका लागि रु. १० करोड रकम छुट्याइएको हो ।

शाक्यले सामुदायिक विद्यालयको गुणस्तर सुधार गरेर विद्यार्थीलाई सामुदायिकतिर आकर्षित गर्न सके निजीमा पढ्न जानेको संख्या स्वतः घट्ने बताए । उनले अहिलेको पुस्ता सूचना, प्रविधि, योजना र नयाँनयाँ ज्ञानमा निपुण भएको भन्दै पुरानाको अनुभवसँग सहकार्य गरेर अघि बढ्ने हो भने सामुदायिक विद्यालयको गुणस्तर स्वतः वृद्धि भएर जाने उल्लेख गरे ।

कार्यक्रममा महानगरका निमित्त नगर शिक्षा अधिकारी तारापति खरेलले शिक्षकलाई शिक्षाको गुणस्तर सुधार ध्यान दिनुपर्ने बताए भने शिक्षा विभागका अधिकृत मोती भट्टराईले पदस्थापन भएका शिक्षकलाई महानगरभित्रको समग्र शैक्षिक गुणस्तरलाई उकास्न र उच्चतम नतिजा प्राप्त गर्ने कुरामा भूमिका खेल्न आग्रह गरे । पदस्थापना भएर ३१ माध्यमिक तहका शिक्षक महानगरमा आएका छन् ।

प्रकाशित मिति: २९ श्रावण २०७६, बुधबार

प्रतिक्रिया दिनुहोस्