धनगढी, कात्तिक २९
नेपाली कांग्रेसका सभापति शेरबहादुर देउवाले चिकित्सा शिक्षाको सुधारका यस पटक उठाएका मागबारे आफूलाई कुनै जानकारी नै नभएको प्रतिक्रिया दिएका छन् ।

पार्टी कार्यक्रमको लागि सुदूरपश्चिम आउनेक्रममा विहीबार धनगढी विमानस्थलमा आयोजित पत्रकार सम्मेलनमा पत्रकारले राखेको जिज्ञासामा उनले यस्तो प्रक्रिया दिएका हन् । सभापति देउवाले डा. केसीले उठाएका मागबारे आफू अनभिज्ञ भएको बताए ।

डाक्टर केसीका अनसन र मागका बारेमा के भन्नुहुन्छ भन्ने पत्रकारको प्रश्नमा उनले भने, ‘अनसन तोड्नुभयो, राम्रो कुरा हो । माग के राख्नुभएको थियो मलाई थाहा छैन ।’ उनले मेरै जिल्लामा गएर डा. केसी अनसन बसेपछि आफूई डर भने लागेको बताए ।

‘डा. केसी मेरै जिल्लामा गएर अनसन बसे,’ उनले भने, ‘जेहोस् अनसन तोडे राम्रै गरे ।’ डा. केसी विहीबार नै काठमाडौं फर्किनुभएको छ । डडेल्धुरामा कार्तिक १७ गतेदेखि अनशन बसेका केसीले नौं दिनपछि २६ गते अनशन स्थगित गरेका थिए ।