देशभर हिमपात र वर्षा जारी, कहिले खुल्छ मौसम?



काठमाडौं, पुस २४
बिहीबार बिहान देशका विभिन्न स्थानमा वर्षा एवं हिमपात जारी छ।

मौसम पूर्वानुमान महाशाखाकी मौसमविद् मञ्जु बासीका अनुसार अहिले देशभरका उच्च पहाडी तथा हिमाली भेगमा हिमपात भइरहेको छ। यस्तै पश्चिमका केही स्थान र पूर्वका थोरै ठाउँमा अहिले पानी परिरहेको छ। पश्चिमी वायुका कारण बुधबार बिहान सुरु वर्षा र हिमपात अझै नरोकिएको हो।

‘आज पनि मौसम खुल्ने सम्भावना छैन,’ मौसमविद् बासीले भनिन्, ‘आज पनि देशका विभिन्न स्थानमा वर्षा र हिमपात जारी नै रहने देखिएको छ।’

मंगलबारदेखि सक्रिय पश्चिमी वायुको प्रभाव त्यही दिनदेखि पश्चिमी क्षेत्रमा सुरु भएको थियो भने बुधबार बिहानदेखि देशभर मौसम बदली भई विभिन्न स्थानमा वर्षा तथा हिमपात सुरु भइरहेकाे हाे।

मौसम पूर्वानुमान महाशाखाले आगामी २४ घण्टाका लागि चेतावनी तथा परामर्श जारी गर्दै भनेको छ : देशका केही स्थानमा हल्कादेखि मध्यमसम्म वर्षा हुने सम्भावनाका साथै उच्च पहाडी तथा हिमाली भूभागका अधिकांश स्थानमा मध्यममदेखि भारीसम्म हिमपात हुने सम्भावना रहेकाले, यसकै कारण जाडो बढ्ने हुनाले चिसोबाट जोगिने उपाय अपनाउनुका साथै यात्रा गर्दा सावधानी अपनाउनुहुन सबैमा अनुरोध छ।

आगामी तीन दिनको मौसम पूर्वानुमान
पुस २४ गते बिहीबार
दिउँसो : देशभर सामान्य बदली रही केही स्थानमा हल्कादेखि मध्यमसम्म वर्षाको सम्भावना छ। देशका उच्च पहाडी तथा हिमाली भूभागका अधिकांश स्थानमा मध्यमदेखि भारीसम्म हिमपात हुने सम्भावना छ।

राति : देशका मध्य तथा पूर्वी भूभागमा सामान्य बदली तथा पश्चिमका भूभागमा आंशिक बदली रही पश्चिमका एक-दुई स्थानमा साथै मध्य र पूर्वका थोरै स्थानमा हल्कादेखि मध्यमसम्म वर्षा हुने सम्भावना छ। देशका मध्य तथा पूर्वी उच्च पहाडी तथा हिमाली भूभागका थोरै स्थानमा हल्का हिमपात हुने सम्भावना छ।

पुस २५ गते शुक्रबार
दिउँसो : देशका पूर्वी र मध्य पहाडी भूभागमा आंशिकदेखि सामान्यसम्म बदली रही बाँकी स्थानमा मौसम सामान्यतया सफा रहनेछ। मध्य र पूर्वी पहाडी भूभागका एक-दुई स्थानमा हल्का वर्षाको सम्भावना छ।

राति : देशका पूर्वी र मध्य पहाडी भूभागमा आंशिक बदली रही बाँकी स्थानमा मौसम सामान्यतया सफा रहनेछ।

पुस २६ गते शनिबार
दिउँसो : देशका पूर्वी र मध्य पहाडी भूभागमा आंशिक बदली रही बाँकी स्थानमा मौसम सामान्यतया सफा रहनेछ।

राति : देशका पूर्वी र मध्य पहाडी भूभागमा आंशिक बदली रही बाँकी स्थानमा मौसम सामान्यतया सफा रहनेछ।

स्राेत : जल तथा माैसम विज्ञान विभाग, माैसम पूर्वानुमान महाशाखा

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2022 Deshko News