किशोरी बलात्कार र हत्या प्रयास आरोपमा प्रहरी जवान पक्राउ, घटना रहस्यमय

धनगढी, कात्तिक १८
डोटीमा १५ वर्षीया किशोरीलाई बलात्कार गरेर हत्या प्रयास गरेको आरोप लागेका प्रहरी जवान पक्राउ परेका छन् । गडसेरा अस्थायी प्रहरी चौकीमा कार्यरत प्रहरी जवान सुशील सिंहलाई कैलालीको सहजपुरमा लुकेर बसेको अवस्थामा सोमबार राति पक्राउ गरिएको सुदूरपश्चिम प्रदेश प्रहरी कार्यालयका निमित्त प्रमुख वरिष्ठ प्रहरी उपरीक्षक मुकेश सिंहले जानकारी दिए । उनले जवानलाई पक्राउ गरेर गम्भीर अनुसन्धान अगाडि बढाइएको बताए ।

जोरायल गाउँपालिका–५ की किशोरीको बलात्कारपछि हत्या प्रयास गरेको भन्दै सोमबार दिउँसो परिवारले प्रहरी जवान सिंहविरुद्ध जिल्ला प्रहरी कार्यालय डोटीमा उजुरी दिएका थिए । अस्थायी प्रहरी चौकी गड्सेराका इन्चार्ज भण्डारीको भूमिकाबारेसमेत कुरा उठेपछि उनलाई जिल्लामा तानिएकोसमेत बरिष्ठ प्रहरी उपरीक्षक सिंहले बताए ।

कात्तिक १३ गते राति घटना भएको किशोरीका बुबाले बताएका छन् । उनका अनुसार सिंहले राति ११ बजे छोरीलाई घरमा सुतेकै कोठामा बलात्कार गरी सलले घाँटीमा बाँधेको र मृत्यु भएको ठानी कोदोबारीमा फालेको अवस्थामा फेला पारिएको थियो । छोरीलाई उनले बिहान ३ बजे अर्धचेत अवस्थामा भेटेका थिए । किशोरीको कात्तिक १५ गते बेलुकी धनगढीस्थित प्रादेशिक अस्पतालमा होस आएको थियो । उनको घाँटीमा नीलडाम छ।

सिंहले आफूलाई निर्घात कुटपिटपछि हत्याको प्रयास गरेको किशोरीले बताएकी छन् । सिंहले पहिल्यैदेखि विवाह गर्ने आश्वासन दिएर फोन गर्ने गरेको र कात्तिक १३ गते भने विवाह नगर्ने भन्दै ज्यान मार्न खोजेको उनको भनाइ छ ।

किशोरीका आफन्त र प्रहरीको कुरा बाँझियो

किशोरीको घर र प्रहरीचौकी आमनेसामने छन् । प्रहरीले सुरुमा किशोरीको परिवारले प्रहरी जवान सिंहले विवाह नगर्ने भनेका कारण किशोरीले आत्महत्याको प्रयास गरेको आरोप लगाएको जिकिर गर्दै आएको छ ।

कात्तिक १४ गते बिहान ८ बजे किशोरीले आत्महत्या प्रयास गरेको भन्दै परिवारका सदस्य प्रहरीमा आएको उक्त चौकीका इन्चार्ज चन्द्रसिंह भण्डारी बताउँछन् । तर, त्यही दिउँसो आमाले सिंहले विवाह नगर्ने भन्दै छोरीलाई मार्ने उद्देश्यले कुटपिट गरेको भनी उजुरी दिएको भण्डारीले बताए ।

सुरुमा किशोरीको परिवारले सिंहले छोरीसँग विवाह गर्नुपर्ने अडान लिएको र त्यति बेला किशोरीको उपचार प्राथमिकतामा रहेकाले त्यसैअनुसार धनगढी लगिएको भण्डारीको भनाइ छ ।

जिल्ला प्रहरी कार्यालय डोटीका प्रमुख जनकराज पाण्डेयले पहिले दुवै पक्षबीच विवाह गर्ने कुराकानी भएपनि पछि किशोरीको परिवारबाट जबरजस्ती र हत्या उद्योगको उजुरी आएको बताए । विस्तृत विवरण घटनाको अनुसन्धानपछि मात्र बताउन सकिने उनले बताए।

किशोरीका आफन्त भने प्रहरीले आत्महत्या प्रयासको बनावटी कुरा बनाएको बताउँछन् । प्रहरी जवान सिंहले हत्या नै गर्न खोजेको किशोरीकी भाउजूले दाबी गरिन् ।

किशोरीका बुबाले पनि प्रहरीबाट नै घटना थप अघि नबढाउन बरु गाउँमै मिलापत्र गरी बिहे गराउन दबाब आइरहेको बताए । छोरी अहिले पनि बचाऊ–बचाऊ भन्दै बेलाबेला बर्बराउने गरेको उनको भनाई छ । उमेर नपुगेकी छोरीलाई संरक्षणको साटो हत्या प्रयास गर्दा पनि न्यायको साटो अनेक कुरा आइरहेको भन्दै उनले दुःख व्यक्त गरे ।