ट्याक्टर दुर्घटना हुँदा ताप्लेजुङमा दाजुभाइसहित चार जनाको मृत्यु
ताप्लेजुङ, कार्तिक २
ताप्लेजुङमा ट्याक्टर दुर्घटना हुँदा एकै घरका दाजुभाइसहित चार जनाको मृत्यु भएको छ ।
जिल्लाको मैवाखोला गाउँपालिका–१ तेल्लावुङबाट वडा नम्बर–५ काम्माङ जाँदै गरेको ५६५५ नम्बरको ट्याक्टर मंगलबार राति साढे १२ बजेतिर ताप्लिङ खोल्सामा दुर्घटना भएको हो ।
जिल्ला प्रहरी कार्यालय ताप्लेजुङकाअनुसार मृत्यु हुनेमा वडा नम्बर–५ कामसाङका ३१ वर्षीय चालक पासाङ शेर्पा र उनका २४ वर्षीय भाइ फुर्वा शेर्पा रहेका छन् ।
त्यस्तै ट्याक्टरमा सवार वडा नम्बर–४ ओदकका २२ वर्षीया शर्मिला शेर्पा र १७ वर्षीया लाकी शेर्पाको पनि घटनास्थलमै मृत्यु भएको ताप्लेजुङ प्रहरीले जनाएको छ ।
घटनास्थलमा साँघु प्रहरी चौकीबाट र सदरमुकाम फुङलिङबाट प्रहरी निरीक्षकको नेतृत्वमा टोली खटिएको छ । घटना के कारणले भएको हो भन्ने खुल्न सकेको छैन् ।
प्रकाशित मिति: २ कार्तिक २०७९, बुधबार
