बैतडीको दशरथचन्द नगरपालिकाले दिन थाल्यो श्रम स्वीकृति

बैतडी, जेठ २ । बैतडीको दशरथचन्द नगरपालिकाले श्रम स्वीकृति दिन सुरु गरेको छ। वैदेशिक रोजगारी जान चाहने व्यक्तिलाई नगरपालिकाले स्वीकृति दिन सुरु गरेको नगरपालिकाका सूचना अधिकारी राजेन्द्र बिष्टले जानकारी दिए।

यसअघि श्रम मन्त्रालयबाट मात्रै दिइने गरेको श्रम स्वीकृति अब स्थानीय तहबाटै प्रदान गर्न सकिने भएपछि नगरपालिकाले पनि श्रम स्वीकृति दिन थालेको हो ।

सरकारले गत चैत १६ गते वैशाख १ गतेदेखि लागू हुने गरेर स्थानीय तहको रोजगार शाखामार्फत श्रम स्वीकृति दिन सक्ने निर्णय गरेको थियो।

सोही निर्णयका आधारमा दशरथचन्द नगरपालिकाले पहिलोपटक कतार जान इच्छुक दशरथचन्द नगरपालिका–६का कोमलराम महरलाई श्रम स्वीकृति प्रदान गरेको छ। महरलाई नगरप्रमुख पुस्करराज जोशीले श्रम स्वीकृति हस्तान्तरण गरे।

बिनाझण्झट कम खर्चमा स्थानीय तहबाटै सरकारले श्रम स्वीकृति प्रदान गर्न थालेपछि वैदेशिक रोजगारीमा जाने व्यक्ति खुसी व्यक्त गरेका छन्।