विराटनगरमा प्रदर्शन : पक्राउ पर्नेको संख्या ४५ पुग्यो
मोरङ, जेठ १४ । कोशी प्रदेश नाम खारेजीको माग गर्दै विराटनगरस्थित प्रदेशसभा कार्यालय घेराउ गर्न जान लागेका ४५ जनालाई प्रहरीले नियन्त्रणमा लिएको छ ।
निषेधित क्षेत्र तोड्न खोज्ने प्रदर्शनकारीलाई प्रहरीले नियन्त्रणमा लिइरहेको छ ।
प्रदर्शनकारीले विराटनगरको देवकोटा चोकमा निषेधित क्षेत्र तोडेर प्रदेशसभातर्फ जान खोजेपछि प्रहरीले नियन्त्रणमा लिएको जिल्ला प्रहरी मोरङ प्रमुख दीपक पोखरेलले बताए । उनका अनुसार प्रदर्शनकारीले भाटा, गुलेलीलगायतका घरेलु हतियारसहित आन्दोलनमा उत्रेका छन् ।
प्रदेशसभाबाट कोशी प्रदेश नामकरण गरेको विरोधमा आदिवासी जनजाति समुदायले प्रदेश १ पुनः नामाङ्कन संयुक्त संघर्ष समिति गठन गरी आन्दोलन गर्दै आएको छ ।
जिल्ला प्रशासन कार्यालय मोरङले प्रदेशसभा, मुख्यमन्त्री तथा मन्त्रिपरिषद्को कार्यालय, मुख्यमन्त्री निवास, प्रदेश प्रमुखको कार्यालय लगायतका क्षेत्रलाई निषेधित क्षेत्र घोषणा गरी सुरक्षा व्यवस्था कडा पारेको छ ।
सुरक्षाकर्मीले कोशी प्रदेशका विभिन्न पहाडीलगायतका जिल्लाबाट आन्दोलनकारी बोकेर विराटनगरतर्फ आउने सवारी साधनलाई पूर्व–पश्चिम राजमार्गमा जाँच गरी फर्काउने र नियन्त्रणमा लिने गरेका छन् ।
अहिले दिउँसो २ बजेबाट प्रदेशसभाको बैठक बस्ने भएकाले आन्दोलनकारीहरू विराटनगरको सहिद मैदान अगाडि भेला भएर प्रदर्शन गर्दै प्रदेशसभातर्फ गइरहेका छन् ।
प्रकाशित मिति: १४ जेष्ठ २०८०, आइतबार
