कर्मचारीलाई कुटपिट गर्ने पूर्व प्रदेश सांसद र वडाध्यक्षलाई कारबाही गर्न माग

सुर्खेत, असार २५ । नेपाल राष्ट्रिय कर्मचारी संगठन, निजामती कर्णाली प्रदेश समितिले मुगुको पूर्वाधार विकास कार्यालयका निमित्त प्रमुख दत्त बुढथापालाई कार्यालय हाताभित्र कुटपिट गर्ने पुर्व प्रदेश सभा सदस्य र वडाध्यक्षलाई कारबाही गर्न माग गरेको छ ।

बुढथापालाई गत असार २३ गते पूर्व प्रदेशसभा सदस्य दानसिंह परियार र छायानाथ रारा नगरपालिका–३ का वडाध्यक्ष खेमबहादुर रावलले कुटपिट गरेको संगठनको आरोप छ ।

संगठनले विज्ञप्ति जारी गर्दै सार्वजनिक सेवा प्रवाह गर्ने कार्यालयमा नै कर्मचारीमाथि भएको कुटपिटजस्ता घटनाले सम्पूर्ण राष्ट्रसेवक कर्मचारीलाई कार्यालयभित्र असुरक्षित भएको महसुस गराएको बताएको छ ।

‘कानुनको संरक्षक र राज्यका जिम्मेवार व्यक्तिहरू नै यस प्रकारको घटनामा संलग्न भई कानुन आफ्नो हातमा लिने कुराले हामी सम्पूर्ण राष्ट्रसेवक कर्मचारीहरू मर्माहत भएका छौँ,’ विज्ञप्तिमा भनिएको छ ।

दोषीमाथि कारबाही नभए आन्दोलनका थप कार्यक्रम अघि बढाउने चेतावनीसमेत संगठनले दिएको छ ।