विमानस्थलबाट अमेरिकी डलरसहित एक जना पक्राउ

काठमाडौं, असार २७ । त्रिभुवन अन्तर्राष्ट्रिय बिमानस्थलबाट अबैध अमेरिकी डलरसहित प्रहरीले एकजनालाई पक्राउ गरेको छ ।

लुकाई छिपाई अवैध रूपमा बाह्य मुलुकतर्फ लैजान लागेको अमेरिकी डलर १ सय दरको ९० थानसहित भारतीय नागरिक २१ वर्षीय शिवम कुमार सैनीलाई मंगलबार राति प्रहरीले पक्राउ गरेको हो ।

एयर ईन्डियाको उडानद्वारा काठमाडौंबाट भारतको दिल्ली प्रस्थान गर्न लागेका उनलाई त्रिभुवन अन्तर्राष्ट्रिय विमानस्थलको अन्तर्राष्ट्रिय उडान तर्फको प्रस्थान ह्‍याण्ड ब्यागेज चेकिङ एरियामा शरीर तलासी गर्ने क्रममा उनको साथबाट उक्त अमेरिकी डलर फेला परेको हो ।

उनलाई आवश्यक अनुसन्धानको लागि नियन्त्रणमा लिएर प्रहरी वृत्त गौशाला पठाइएको प्रहरीले जनाएको छ ।