एमाले भोजपुरको नेतृत्वमा मकर खड्काको प्यानल विजयी
भोजपुर २२ बैशाख । नेकपा एमाले भोजपुरको नवौँ जिल्ला अधिवेशनबाट अध्यक्ष मकर खड्काको प्यानल विजयी भएको छ ।
अध्यक्षका अर्का प्रत्यासी शरणकुमार राईलाई ९४ मतको अन्तरले पराजित गर्दै खड्का जिल्ला अध्यक्षमा निर्वाचित भएका हुन् । खड्काले ३१७ मत ल्याउँदा राईले २२३ मत ल्याए ।
अध्यक्षमा निर्वाचित भएका खड्का निवर्तमान उपाध्यक्ष हुन् भने राई निवर्तमान अध्यक्ष हुन् । दुवै जनाले प्यानल बनाएर प्रतिस्पर्धा गरेका थिए ।
यस्तै उपाध्यक्षमा किरण राई निर्वाचित भएका छन् । उनले मत ३११ ल्याए । उनका प्रतिस्पर्धि कृपाशुर शेर्पाले २१६ मत पाए । निवर्तमान जिल्ला सचिव रहेका राई पौवादुङमा गाउँपालिका अध्यक्षसमेत हुन् ।
सचिवमा एक्सन राईले ३४७ मत ल्याएर निर्वाचित भए । उनका प्रतिस्पर्धि ज्ञानेन्द्र कार्कीले १६८ मत पाए ।
खुल्ला उपसचिवमा दौलत राई निर्वाचित भएका छन् । राईले ३०४ मत ल्याउँदा उपसचिवका अर्का उम्मेदवार जगत चौहानले १७३ मत ल्याए । यसैगरी महिला उपसचिवमा रमा राई निर्वाचित भएकी छन् । रमाले २९२ मत ल्याउँदा मेरिका राईले २१६ मत ल्याइन् ।
पदाधिकारीमा निर्वाचित भएका सबै मकर खड्का समूहका हुन् । नेताहरुले सहमतिमा नेतृत्व चयनको प्रयास गरेपनि सर्वसम्मत हुन नसकेपछि दुई समूहले फरकफरक समूह बनाएका थिए ।
शनिबार सम्पन्न निर्वाचनमा ५७४ जना प्रतिनिधिले मतदान गरेका थिए ।
प्रकाशित मिति: २२ बैशाख २०८१, शनिबार
