जसपा नेपाल फेरि फुट्यो, पहिचानबादी अलग
काठमाडौं, वैशाख २७ । उपेन्द्र यादव नेतृत्वको जनता समाजवादी पार्टी (जसपा) नेपाल फेरि फुटेको छ ।
अशोक राईको नेतृत्वमा नयाँ दल बनेको एक साता नबित्दै पार्टीबाट अर्को समूह बाहिरिएको हो ।
राजनीतिक समिति सदस्य खगेन्द्र माखिमलगायतको समूहले पहिचानबादी मोर्चा बनाउँदै पार्टी अलग भएको घोषणा गरेका हुन् ।
माखिमसहित राजनीतिक र केन्द्रीय समितिका सदस्यहरूले बिहीबार पत्रकार सम्मेलन गरेर प्रा.डा. महेन्द्र लावतीको संयोजकत्वमा पहिचानवादी मोर्चा घोषणा गरेका हुन् ।
माखिम नेतृत्वको संघीय लिम्बुवान पार्टीले २०७४ वैशाखमा जसपासँग एकता गरेको थियो ।
उनीहरूले पछिल्लो समय पार्टीको मुख्य नेतृत्व सत्ताको खेलमा लागेको, गैरलोकतान्त्रिक आचरण अवलम्बन गरेको, पहिचानको आन्दोलनमा सक्रिय नभएको आरोप लगाएका छन् ।
मोर्चाले पहिचानको मुद्दालाई सशक्त बनाउन, विभिन्न समूहमा रहेका पहिचानवादी दल, संगठन, अभियन्ता सबैलाई एकतावद्ध भई अघि बढ्न आह्वान गरेको छ ।
प्रकाशित मिति: २७ बैशाख २०८१, बिहिबार