सडकमा भेटिएको रकम ट्याक्सी चालकले प्रहरीलाई जिम्मा लगाए

दमक, १२ जेठ सडकमा भेटिएको रकम झापा दमकका एक ट्याक्सी चालकले प्रहरीमा बुझाएका छन् । दमक–१ घर भएका प्रह्लाद गौतमले दमकचोकको ट्याक्सी पार्कमा जेठ ११ गते दिउँँसो भेटेको रु २९ हजार इलाका प्रहरी कार्यालयमा बुझाएका हुन् ।

हराएको व्यक्तिले आफनो रकम दाबी गरे रकम फिर्ता गरिदिने शर्तमा गौतमले प्रहरी नायब निरीक्षक रामप्रसाद भट्टराईलाई उक्त रकम बुझाएका हुन् । सडकमा छरपस्ट अवस्थामा पैसा झरेपछि त्यस पैसा सम्बन्धित व्यक्तिसम्म पुगोस् भन्ने हेतुले रकम प्रहरीमा बुझाएको गौतमले बताए ।

सडकमा भेटिएको रकम यसरी बुझाउने कार्य चालक गौतममा इमान्दारिताका साथ देखिएको प्रहरी नायब उपरीक्षक श्यामल सुब्बाले बताए । भेटिएको रकम बुझाउन चालक गौतमसँगै जीवनचक्र समाजका अध्यक्ष गणेश गौतम र सञ्चारकर्मी प्रहरी कार्यालयमा पुगेका थिए ।
–