युवती पिट्ने ‘धर्तीमाता’ रिहा

काठमाडौंको भद्रकालीमा आफूलाई धर्तीमाता भन्दै युवतीलाई कुटपिट गर्ने विष्णु कुँवर ३० हजार रुपैयाँ धरौटीमा रिहा भएकी छिन् ।

उनी जिल्ला प्रशासन कार्यालय काठमाडौंबाट १० हजार र जिल्ला अदालत काठमाडौंबाट २० हजार गरी कुल ३० हजार रुपैयाँ धरौटीमा मंगलबार रिहा भएकी हुन् ।

उनले भद्रकाली मन्दिरमा एक युवतीलाई कुटपिट गरेको भिडियो सामाजिक सञ्जालमा भाइरल बनेपछि उनलाई पक्राउ गर्न चौतर्फी दबाब सिर्जना भएको थियो । सोही दबाबका कारण काठमाडौं प्रहरी परिसरको विशेष टोलीले कुँवरलाई १३ असारमा बालाजुबाट पक्राउ गरेको थियो ।

युवतीलाई कुटपिट गरेको भिडियो भाइरल भए पनि उनीमाथि मुद्दा दायर गर्न पीडित पक्ष उपस्थित भएको थिएन ।