माछा मार्नेक्रममा करेन्ट लागेर एक जनाको मृत्यु, चार जना पक्राउ
स्याङ्जा, भदौ २२ । स्याङ्जाको वालिङ नगरपालिका–६ स्थित रसखोलामा माछा मार्ने क्रममा एक जनाको मृत्यु भएको छ ।
३६ वर्षीय यमबहादुर थापाको मृत्यु भएको जिल्ला प्रहरी कार्यालय स्याङ्जाका इन्स्पेक्टर पावल सिंह लामाले जानकारी दिए ।
यम बहादुरसँगै माछा मार्न गएका ४ जनालाई प्रहरीले शुक्रवार बिहान पक्राउ गरेको छ ।
पक्राउ पर्नेमा वालिङ–६ बस्ने तिल बहादुर थापा क्षेत्री, पाल्पा घर भएका दीपेन्द्र अधिकारी, पर्वत घर भएका अनिल चौधरी र कञ्चनपुर घर भएका ६० वर्षीय बलदेव राना छन् ।
प्रहरीले पक्राउ परेकाहरूको साथबाट माछा मार्न प्रयोग गरिने तार, रड र बाँसको घाटा बरामद गरेको छ ।
मृतकको शव पोष्टमार्टमका लागि प्राथमिक स्वास्थ्य केन्द्र वालिङमा पठाइएको छ ।
प्रकाशित मिति: २२ भाद्र २०८०, शुक्रबार
