यी सात जिल्लामा छैनन् कोरोना संक्रमित
काठमाडौं, साउन २४
यसअघि देशका सबै जिल्लामा कोरोना संक्रमण देखिएपनि अहिले केही जिल्ला भने संक्रमण मुक्त भएका छन् । यसअघिसम्म देशका सबै जिल्लामा कोरोना संक्रमित देखिएका थिए । तर, अहिले खोटाङ, धनकुटा, सङ्खुवासभा, मनाङ, मुस्ताङ, डोल्पा र हुम्ला जिल्लामा संक्रमण संक्रमित छैनन् ।
स्वास्थ्य तथा जनसङ्ख्या मन्त्रालयद्वारा आयोजित नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले देशका सात जिल्ला कोरोना संक्रमण मुक्त भएको जानकारी दिए ।
उनका अनुसार गत २४ घण्टामा कोभिड–१९ बाट थप तीन जनाको मृत्यु भएको छ भने देशका विभिन्न जिल्लामा थप ३७८ जनामा कोरोना सङ्क्रमण पुष्टि भएको छ ।
गत २४ घण्टामा कोरोनामुक्त भई घर फर्किनेको सङ्ख्या ४९९ जना छन् । हालसम्म निको भएर डिस्चार्ज हुनेको कूल संख्या १६ हजार ३१३ रहेको छ ।
प्रकाशित मिति: २४ श्रावण २०७७, शनिबार
