धनुषा, चैत्र १७
धनुषामा प्रहरीले स्रोत नखुलेको १४ लाख रुपैयाँसहित दुई जनालाई पक्राउ गरेको छ ।

जिल्लाको जनकनन्दनी गाउँपालिका–५ बनरझुल्ला अगाडि ईलाका प्रहरी कार्यालय खजुरीबाट प्रहरी निरीक्षकको कमाण्ड र प्रहरी चौकी बल्हागोठबाट प्रहरी सहायक निरीक्षकको कमाण्डमा खटिएको संयुक्त चेकिङ टोलीले दुवैलाई पक्राउ गरेको हो ।

जयनगरबाट जनकपुरतर्फ आउँदै गरेको प्रदेश नं. २–०२–००३ प ७०४५ नम्बरको मोटरसाइकल चेकजाँच गर्ने क्रममा चालक धनुषाको धनुषाधाम नगरपालिका–२ धनुषाधाम बस्ने ५५ वर्षीय जोगिन्द्र यादवको साथबाट १० लाख र मोटरसाइकल पछाडि बसेका १९ वर्षीय कृष्ण साहको साथबाट नेपाली नगद ४ लाख समेत गरी जम्मा नेपाली रुपैयाँ १४ लाख बरामद गरिएको प्रहरीले जनाएको छ ।

दुवै जनामाथि प्रहरीले थप अनुसन्धान थालेको छ ।