काठमाडौं, जेठ ३ । नागरिक उन्मुक्ति पार्टीको पदाधिकारी बैठक डिल्लीबजार कारागारमा बसेको छ ।

कैलालीको टिकापुरमा २०७२ सालमा भएको हिंसात्मक घटनाका प्रतिवादी रेशमलाल चौधरीलाई सफाइ दिन सर्वोच्च अदालतले अस्वीकार गरेपछि नागरिक उन्मुक्ति पार्टीले पदाधिकारी बैठक बोलाएको हो ।

सत्ता साझेदारी दलको रूपमा रहेको नागरिक उन्मुक्ति सरकारमा रहने कि नरहने भन्ने विषयमा छलफल गर्न बैठक बसिरहेको सङ्गठन विभागका प्रमुख लक्ष्मणकिशोर चौधरीले बताए । उनले सरकारसंग भएको रेशम चौधरीको रिहाको सर्त पूरा नभएपछि अब सरकारमा बस्ने वा नबस्ने भन्ने विषयमा निर्णय गर्न बैठक बसेको बताए ।

नागरिक उन्मुक्तिले रेशमको रिहाई गर्नुपर्ने सम्झौता गर्दै सरकारमा सहभागी भएको थियो । तर मंगलबार सर्वोच्चले उच्च अदालत दिपायलले गरेको जन्मकैदको फैसलालाई नै सदर गरेको छ ।