गिभिनाले नर्सहरूसँग मागिन् माफी, विवाद समाधान
काठमाडौं, जेठ ११ । सामाजिक अभियन्ता गिभिना मगरले नर्सहरूसँग माफी मागेकी छिन् । केही दिनअघि भरतपुरस्थित विपी कोइराला मेमोरियल क्यान्सर अस्पतालको इमर्जेन्सी कक्षमा कार्यरत नर्स र गिभिनाबीच भएको विवादमा उनले माफी मागेकी हुन् ।
क्यान्सरको उपचाररत बालिकालाई लिएर अस्पताल पुगेकी गिभिनाले बिरामी बालिकालाई नर्सहरूले समयमा खोप र औषधि नदिएको आरोप लगाउँदै टिकटकमा लाइभ गरेपछि विवाद भएको थियो ।
भिडियो भाइरल भएपछि सर्वसाधारणले नर्स र नर्सिङ प्रेसाप्रति नै अश्लील गाली–गलौज गरिरहेका छन् । गिभिनाको कार्यले नर्सहरूको चरित्र हत्या गरेको भन्दै नर्सहरू अन्दोलनमासमेत उत्रिएका थिए ।
नर्सहरू आन्दोलनमै उत्रिएपछि गिभिनाले सार्वजनिक रूपमा माफी मागेकी हुन् । उनले आफू र नर्सबीच मिसअन्डरस्ट्यान्डिङ भएको थियो र आफू भावनामा डुबेँको उनले बताएकी छिन् ।
गिभिनाले आफ्नो उद्देश्य नर्सहरुलाई गलत देखाउनु नरहे पनि भूलवश गल्ती भएको स्वीकार गरेकी छन्। साथै उनले आगामी दिनमा यस्तो गल्ती नदोहोरिने प्रतिबद्धता पनि व्यक्त गरेकी छन्।
प्रकाशित मिति: ११ जेष्ठ २०८०, बिहिबार
