लागुऔषधसहित ३ जना पक्राउ

धनगढी, असार २१ । सुदूरपश्चिम प्रदेशको अस्थायी राजधानी धनगढीबाट लागुऔषधसहित तीन जना पक्राउ परेका छन् । कैलाली प्रहरीले धनगढी उपमहानगरपलिका–३ र ८ बाट तीन जनालाई पक्राउ गरेको जनाएको छ ।

धनगढी उपमहानगरपालिका–३ को सब्जिमण्डीबाट १९० मिलिग्राम लागुऔषध खैरो हेरोईनसहित २० वर्षीय ज्ञानु धामी र २० वर्षकै मनोज केसीलाई पक्राउ गरिएको जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) कुलदीप चन्दले जानकारी दिए ।

यस्तै वडा नम्बर ८ को धनगढी गाउँबाट ६ मिलिग्राम लागुऔषध खैरो हेरोईनसहित ३४ वर्षीय रामबिलाश रानालाई बुधबार साँझ पक्राउ गरिएको छ ।

उनीहरु तीनै जनालाई नियन्त्रणमा लिएर अनुसन्धान भइरहेको प्रहरीले जनाएको छ ।