इजरायलबाट भारत हुँदै थप १९ जना नेपाली फर्किँदै, गौरीफन्टा नाकाबाट भित्रिने

काठमाडौं, असोज ३० । इजरायलमा हमासको आक्रमणपछि नेपाल आउन चाहेक थप १९ जना नेपालीलाई आज भारतीय जहाजमार्फत फकिँदैछन् ।

सरकारले भारतीय जहाजमार्फत् इजरायलमा रहेको १९ जना नेपालीको उद्धार गरेको हो । परराष्ट्र मन्त्री एनपी साउदले इजरायलको तेल अभिभबाट भारतको उद्धार जहाजमार्फत् १९ नेपालीको उद्धार गरिएको जानकारी दिए।

मन्त्री साउदले स्वदेश आउन लागेका नेपालीलाई दिल्लीस्थित दूतावासले सवारी साधनको व्यवस्था गरेर नेपाल पठाउने पनि जानकारी दिए।

नयाँ दिल्लीस्थित नेपाली दूतावासले इजरायलबाट उद्धार गरी ल्याइएका नेपालीलाई गौरीफन्टा नाका भएर कैलाली भित्र्याउने छ। कैलालीबाट जिल्ला प्रशासन कार्यालयले उनीहरूलाई सम्बन्धित स्थानमा पुर्‍याउने तयारी गरिएको मन्त्रालयले जनाएको छ।