सरकारी दस्तखत कीर्ते गरेको आरोपमा नायब सुब्बा पक्राउ

उदयपुर, मंसिर १३ । उदयपुर जिल्लाको त्रियुगा नगरपालिकाका राजस्व शाखा प्रमुख नायब सुब्बालाई सरकारी दस्तखत कीर्ते गरेको कसुरमा प्रहरीले पक्राउ गरेको छ ।

पक्राउ पर्ने नगरपालिकाका राजस्व शाखा प्रमुख ४७ वर्षीय गुरुप्रसाद ढकाल रहेको जिल्ला प्रहरी कार्यालयले जनाएकाले छ ।

नगरपालिकामा कार्यरत रहँदा ढकालले जनप्रतिनिधि र अन्य कर्मचारीको कीर्ते हस्तारक्षर गरेर आर्थिक कार्यका गतिविधि गरेको उजुरी अख्तियारमा परेको थियो ।

उजुरी परेपछि सम्पर्कविहिन रहेका ढकाललाई प्रहरीले खोजी गरेर पक्राउ गरी अनुसन्धान सुरु गरेको जिल्ला प्रहरी कार्यालयका सूचना अधिकारी तथा प्रहरी नायब उपरीक्षक हरिनन्दन चौधरीले जानकारी दिए ।

उनका अनुसार ढकालविरुद्ध पाँच दिनको म्याद थप गरेर अनुसन्धान सुरु गरिएको छ । ढकालविरुद्ध एक महिनाअघि नै पक्राउ पुर्जी जारी भएको थियो ।