सुदूरपश्चिम प्रदेशका मुख्यमन्त्री सोडारीले पाए विश्वासको मत
धनगढी । सुदूरपश्चिम प्रदेशका मुख्यमन्त्री दीर्घ सोडारीले विश्वासको मत पाएका छन् ।
बिहीबार बसेको प्रदेशसभा बैठकबाट सोडारीले विश्वासको मत पाएका हुन् । प्रदेशसभामा कुल २८ सांसद उपस्थित रहेकामा सबै सांसदले सोडारीलाई विश्वासको मत दिएका हुन् ।
त्यस्तै, उक्त प्रस्तावको विपक्षमा शून्य र तटस्थमा शून्य मत परेको छ । ५३ सदस्यीय प्रदेशसभामा २८ सांसदले पक्षमा मत दिएपछि सोडारीले विश्वासको मत पाएका हुन् ।
नेपाली कांग्रेस र नागरिक उन्मुक्ति पार्टीको रेशम चौधरी पक्षका सांसदहरूले भने बैठक बहिष्कार गरेका थिए । मुख्यमन्त्रीको नियुक्ति प्रक्रिया नै असंवैधानिक रहेको भन्दै कांग्रेसले बैठक बहिष्कार गरेको हो ।
कांग्रेस र रेशम पक्षका सांसदहरू नाराबाजी गर्दै बाहिरिएपछि सदनमा मतदान भएको थियो ।
प्रकाशित मिति: ३ जेष्ठ २०८१, बिहिबार
