बझाङमा उद्धारको नमुना अभ्यासका क्रममा सशस्त्रका जवानको मृत्यु
![](https://www.deshkonews.com/wp-content/uploads/2024/04/death.jpeg)
धनगढी, जेठ २८ । बझाङमा प्राकृतिक विपद्का बेला हुने उद्धारको नमुना अभ्यास गर्ने क्रममा सशस्त्र प्रहरीका एक जवानको मृत्यु भएको छ ।
अभ्यासका क्रममा बेहोस भएका अनआश्रित गुल्म बझाङमा कार्यरत सशस्त्र प्रहरी जवान केदास्यु गाउँपालिका–७ का २९ वर्षीय नरेन्द्रसिंह धामीको मृत्यु भएको हो ।
सोमबार बिहान जयपृथ्वीबहादुर नगरपालिका स्थित सेती नदीमा नेपाली सेनाको वीरभद्रजंग गुल्म नजिकै प्राकृतिक विपद् उद्धारसम्बन्धी नमुना अभ्यास गर्ने क्रममा धामी बेहोस भएका थिए । उपचारका लागि जिल्ला अस्पताल पुर्याइए पनि चिकित्सकले मृत घोषणा गरेको बझाङका प्रमुख प्रहरी नायब उपरीक्षक(डीएसपी) भरत शाहले जानकारी दिए ।
सशस्त्र प्रहरी र नेपाली सेनाले संयुक्त रूपमा प्राकृतिक विपद्का बेला बाढीमा फसेका सर्वसाधारणको उद्धारसम्बन्धी नमुना अभ्यास गराइरहेको थियो ।
प्रकाशित मिति: २८ जेष्ठ २०८१, सोमबार