महेश बस्नेतको प्रश्न – चोर्न र लुट्न गएका आन्दोलनकारीले १५ लाख पाउने, प्रहरीले चै के पाउने ?

काठमाडौं । नेकपा एमालेका नेता महेश बस्नेतले जेनजी आन्दोलनका क्रममा ज्यान गुमाउने सबैलाई समान दृष्टिले हेर्न आग्रह गरेका छन् ।

मंगलबार बिहान सामाजिक सञ्जालमार्फत उनले राज्यले प्रहरीको मनोबल उच्च बनाउन तत्काल कदम चाल्नुपर्ने माग गरेका हुन् ।

सरकारले ‘जेनजी स्मृति पार्क’ निर्माण गर्ने निर्णयलाई बस्नेतले सकारात्मक भन्दै ‘जेनजी’ नाम हिंसा, आगजनी र विध्वंशसँग जोडिँदै बदनाम भएको भन्दै यसको सट्टा ‘डीजी स्मृति पार्क’ नामकरण गर्न सुझाव दिएका छन् ।

बस्नेतले आन्दोलनकै क्रममा ज्यान गुमाएका प्रहरीहरूको सम्मानमा पनि छुट्टै स्मृति पार्क बनाउनुपर्ने आवश्यकता औंल्याउँदै भने, ‘जेनजी आन्दोलनतर्फ मारिएका व्यक्तिलाई १५ लाख दिइने र ‘शहीद’ घोषणा गरिने निर्णय राम्रो कदम हो। तर, अन्य ५१ जनाको हकमा के हुन्छ ? प्रहरीलाई त्यही निर्णय लागू हुन्छ कि हुँदैन ? एउटै घटनामा ज्यान गुमाएका सबैलाई समान दृष्टिले हेर्नैपर्छ।’

उनले चेतावनी दिँदै थपे, ‘कदाचित चोर्न, लुट्न र मान्छे मार्न गएका आन्दोलनकारीले १५ लाख पाउने तर राष्ट्र र नागरिकको सुरक्षार्थ खटिएका प्रहरीहरूले उचित सम्मान र राहत नपाउने अवस्था आयो भने, यसले भविष्यमा अर्को किसिमको द्वन्द्व निम्त्याउने निश्चित छ।’

यसैबीच, नेपाल प्रहरीले आफ्नै संगठनभित्रबाट सराहनीय कदम चालेको छ । प्रहरी निरीक्षकदेखि माथिका पदमा रहेका सम्पूर्ण अधिकृतहरूको तलब कटौती गरेर मृत प्रहरीका परिवारलाई १० लाख राहत दिने निर्णय गरिएको छ। बस्नेतले यसलाई उच्च प्रशंसा गर्दै धन्यवाद ज्ञापन गरेका छन्।