अमेरिकालाई नेपाली सेनाले दियो मुखभरीको जवाफ, ४० वर्षपछि भयो यस्तो अभ्यास
![](https://www.deshkonews.com/wp-content/uploads/2019/11/trump-purnachandra.jpg)
काठमाडौं, मंसिर १२
अमेरिकाले नेपालमा भारतीय आतंकवादी समूह मुजाहिद्दिनको अखडा बनिरहेको भन्दै सार्वजनिक गरेको रिपोर्टको नेपाली सेनाले कडा जवाफ दिएको छ । रिपोर्ट सार्वजनिक भएको करिब एक महिनापछि नेपाली सेनाले जवाफ फर्काएको हो । अमेरिकी प्रतिवेदनमा भनिएझैँ नेपालको सुरक्षा स्थिति कमजोर नरहेको सन्देश दिनेगरी सेनाले प्रतिआतंकवाद तथा ‘एन्टी हाइज्याकिङ’ सम्बन्धी कारबाहीमा उत्कृष्ट मानिएको टोलीसँग संयुक्त अभ्यास गरेको छ ।
प्रतिवेदन सार्वजनिक भएपछि ८ मंसिरबाट सेनाले सञ्चालन गरेको तालिम अर्थपूर्ण रहेको बताइएको छ । उक्त तालिम आफैंमा अमेरिकी प्रतिवेदनले भनेजस्तो अन्तर्राष्ट्रिय सुरक्षामा हामी तयार छैनौं भन्ने विषयमा काउन्टर भएका सैनिक अधिकृतहरु बताउँछन् ।
इजरायली डिफेन्स फोर्सको सहयोगमा भएको प्रतिआतंकवाद सम्बन्धी तालिमको निरीक्षण गर्ने क्रममा प्रधानसेनापति पूर्णचन्द्र थापाले पनि भनेका छन्, ‘आतंकवाद तथा जटिल र संवेदनशील सुरक्षा चुनौतीहरुको सामना गर्न नेपाली सेना सक्षम छ ।’
थापाले यस प्रकारको तालिमबाट दुवै देशका विशेष फौजहरुको पेशागत ज्ञान, सैनिक कला तथा इन्टरओपरेबलिटी वृद्धिका लागि अवसर प्रदान हुने बताए ।
नेपाली सेनाले लामो समयको अन्तरालपछि इजरायली काउन्टर टेरोरिजम टोलीसँग अभ्यास गरेको हो ।
अभ्यासमा युद्धभैरव गणका विशेष फौज सहभागी थिए । सेनाको विशेष दस्ता निर्माण गर्न पहिलो पटक तालिम दिने टोली पनि यही हो । अधिकृतहरुका अनुसार वि.सं. २०३६/०३७ सालतिर पहिलो पटक यो तालिम भएको थियो । नेपालमा स्थिर सरकार भएका बेला ४० वर्षपछि यस्ताे तालिम भएकाे हाे । जसले अमेरिकाे प्रश्नकाे ठाडाे जवाफ दिएकाे छ ।
प्रकाशित मिति: १२ मंसिर २०७६, बिहिबार