दीपकलाई जितासिंह शिक्षा पुरस्कार

काठमाडौँ, मंसिर १४

किरात राई रानाहँछा समाज, काठमाडौँको वार्षिक भेला शनिबार राजधानीमा सम्पन्न भएको छ । उक्त अवसरमा देशभरिका सरकारी विद्यालयबाट एसएलसीमा उत्कृष्ट अङ्क ल्याई उत्तीर्ण हुने किरात राई रानाहँछा बंश मध्येका सर्वोत्कृष्ट विद्यार्थी दीपक रानाहँछालाई प्रमाणपत्रसहित १० हजार राशिको जितासिंह शिक्षा पुरस्कार प्रदान गरियो ।

प्रमुख अतिथि अटलशेर राई तथा संस्थाका सल्लाहकार जुक्तिमान राईले संयुक्त रुपमा पुरस्कार प्रदान गरेका थिए । राईद्वयले पुरष्कृत विद्यार्थीलाई बधाई तथा शुभकामना दिँदै भने, ‘जीवनमा अझै प्रगति गर्दै जानू, बंशको शान फैलाउनू ।’

मेरिला–१, सिम्पानी, खोटाङका दीपकले आफ्नै गाउँको श्रीकृष्ण माध्यमिक विद्यालयबाट यस वर्षको एसएलसी परीक्षामा ६८.७५ प्रतिशत अङ्क ल्याई उत्तीर्ण गरेका थिए ।

संस्थाका अध्यक्ष चन्द्रकुमार राईको अध्यक्षतामा सम्पन्न कार्यक्रममा साहित्यकार मदन राई ‘लामाखुले’, कवि तथा कलाकार चन्द्र रानाहँछा, समाजसेवीहरू जितेन्द्र राई, ध्यानप्रसाद राई, विमला राईलगायतले मन्तव्य व्यक्त गरेका थिए ।

अक्षय कोष बृद्धिका लागि साउदी अरबमा कार्यरत युवा जोगेन्द्र राईले पनि नगद सहयोग गरेका थिए ।