मलद्वारमा लुकाएर ल्याएको ब्राउन सुगरसहित २ जना नियन्त्रणमा

काठमाडौँ । मोरङको उर्लाबारी नगरपालिका ७ गोलचोकबाट लागू औषध (ब्राउन सुगर)सहित दुई जनालाई प्रहरीले नियन्त्रणमा लिएको छ।

इलाका प्रहरी कार्यालय उर्लाबारीबाट खटिएको टोलीले प्र.१-०२ण्०५० प १९६० नम्बरको मोटरसाइकल चेकजाँच गर्ने क्रममा चालक उर्लाबारी–६ बस्ने २९ वर्षीय केशव श्रेष्ठ र पछाडि सवार उर्लाबारी ५ बस्ने २४ वर्षीय निश्चल गुरुङलाई नियन्त्रणमा लिएको हो ।

चेकजाँचका क्रममा केशव श्रेष्ठको मलद्वारबाट प्लास्टिकसहित १८ ग्राम ९२० मिलिग्राम र प्लास्टिकबाहेक १४ ग्राम ७२० मिलिग्राम लागू औषध (ब्राउन सुगर जस्तो देखिने खैरो लिसाइलो पदार्थ) फेला परेको प्रहरीले जनाएको छ ।

त्यसैगरी, निश्चल गुरुङको मलद्वारबाट पनि प्लास्टिकसहित ११ ग्राम र प्लास्टिकबाहेक ९ ग्राम ४०० मिलिग्राम लागू औषध फेला परेको छ । हाल दुवै जनालाई लागू औषधसहित नियन्त्रणमा लिएर थप अनुसन्धान भइरहेको छ।