इरान–कतार वार्ता : रोकिएका सम्पत्ति र अमेरिका–इरान सम्झौताबारे छलफल हुने

दोहा । इरान र कतारबिच आज हुने उच्चस्तरीय वार्तामा अमेरिका–इरानबिच भएको समझदारी कार्यान्वयन तथा इरानका रोकिएका सम्पत्तिको विषयमा छलफल हुने भएको छ ।

इरानको विदेश मन्त्रालयका प्रवक्ता इस्माइल बघाईले दोहामा हुने वार्तामा कतारी पक्षसँग समझदारीपत्रका केही प्रावधान कार्यान्वयनबारे छलफल हुने बताए । उनका अनुसार यसमा इरानको रोक्का गरिएको सम्पत्ति फुकुवा गर्ने विषय पनि समावेश हुनेछ ।

यद्यपि बाघेईले निकट भविष्यमा इरानी वार्ता टोलीको अमेरिकी प्रतिनिधिमण्डलसँग भेटघाट गर्ने कुनै योजना नरहेको स्पष्ट पारे । यसैबिच, कतारको विदेश मन्त्रालयका प्रवक्ता माजेद अल–अन्सारीले अमेरिकी विशेष दूत स्टिभ विटकफ र अमेरिकी राष्ट्रपति डोनाल्ड ट्रम्पका ज्वाइँ जारेड कुस्नर दोहा पुगेको जानकारी दिए ।

उनका अनुसार उनीहरू कतारी मध्यस्थकर्तासँग छलफलका लागि आएका हुन् । तर, अमेरिकी प्रतिनिधिमण्डल र इरानी अधिकारीबिच कुनै प्रत्यक्ष भेटवार्ता तय नभएको उनले स्पष्ट पारे ।

इरानका करिब ६ अर्ब अमेरिकी डलर बराबरका रोकिएका कोष अझै उसलाई हस्तान्तरण नभएको जानकारी दिँदै वार्ताको प्रगतिअनुसार उक्त रकम इरानलाई उपलब्ध गराइने अन्सारीले बताए ।