बजेट विनियोजनमा त्रुटी भएको जनप्रतिनिधिबाट स्वीकार



मोरङ, जेठ २६

मोरङको  रतुवामाई नगरपालिकाका जनप्रतिनिधिहरुले बजेट बिनियोजन त्रुटिपूर्ण भएको बताएका छन् । शनिवार साना किसान कृषि सहकारी संस्था लिमिटेड रतुवामाई–६ सिजुवाले आयोजना गरेको सामुदायिक सर्पदंश उपचार केन्द्र सिजुवालाई उपचार उपकरण तथा हस्तान्नतरण कार्यक्रममा बोल्दै नगर प्रमुख,उपप्रमुख तथा वडाध्यक्षहरुले बजेट बिनियोजनका क्रममा गल्ती भएको बताएका हुन् ।

दस वटा वडाका मन्दिरहरुलाई ५ देखि ७ लाख रूपैयाँ बिनियोजन गरिएपनि मान्छेको जिन्दगीसँग प्रत्यक्ष जोडिएको सर्पदंश केन्द्रलाई चारआना पनि बजेट बिनियोजन नहुनु गम्भीर गल्ती भएको कार्यक्रममा प्रमुख अतिथि तथा नगरपालिका प्रमुख रविन राईले बताए ।

बजेट बिनियोजनका क्रममा वडाध्यक्षहरुले खाली मन्दिर–मन्दिर भनेर मन्दिरहरुलाई बढी रकम छुट्टयाए लबिङ गर्दा सर्पदशंलाई उपेक्षा गरेको जस्तो भएको कार्यक्रमकी विशिष्ट अतिथि तथा नगरपालिकाकी उपप्रमुख दमयन्ता चुडालले बताईन् ।उनले छुट्ट्याउनु पर्ने ठाँउमा बजेट बिनियोजन नहुनु स्वर्ग जानु कुतीको बाटो भएको उल्लेख गरिन् ।

कार्यक्रममा बोल्ने अधिकांश जनप्रतिनिधिहरुले ज्यान रहेमात्र भगवान्को दर्शन हुने कुरालाई बजेट बिनियोजनाका समयमा बुझ्न नसकेकोमा दुख ब्यक्त गरे । मानविय संवेदनालाई भुलेर अति संकटका साथ सञ्चालन भईरहेको संस्थालाई रु १ लाख मूल्य बराबरका उपचार उपकरण प्रदान गरेर साना किसानले गरिब साथीहरुको साथीलाई पुष्टी गरेको साना किसान सिजुवाका प्रबन्धक ऋषिकुमार ढकालले बताए ।

ढकालले जनयुद्घको क्षति संस्थाले आफै परिपूरण गर्न नसकिरहेको अवस्था भएपनि मानवीय संवेदना र सामाजिक उत्तरदायीत्वलाई संस्थाले सगौरव प्रस्तु्त गर्नु जनप्रतिनिधिहरुकै लागि आँखा खोल्ने कदम भएको बताए । साना किसान विकास वित्तीय संस्था र साना किसान कृषि सहकारी सिजुवाको ५०/५० हजार रुपैयाँ लगानीमा सर्पदंशलाई शैय्या १ थान,ट्रली १ थान,आई भि स्टेण्ड १ थान,सेफ बक्स १ थान र सर्पदंशको विरामीलाई भाईल चढाउने क्रममा ननिदाओस् भनी उपचार कक्षमा ३२ इन्चको प्रदान गरिएको प्रबन्धक ढकालले बताए ।

उपचार उपकरण तथा सामग्री हस्तान्तरण कार्यक्रममा संस्थाका अध्यक्ष द्रोण पौडेल,सल्लाहकार समितिका अध्यक्ष चुडामणि सङग्रौला,नगरपालिकाका वडा न।६,७,८ र ९ का वडाध्यक्ष लगायतको सहभागिता रहेको थियो ।

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2021 Deshko News