नेपालमा बढ्दो चिनियाँ प्रभाव रोक्न भारतको यस्तो हर्कत
काठमाडौं, पुस २०
भारतले नेपालका लागि भारतीय नयाँ राजदूत पठाउने तयारी थालेको छ ।
नेपालका लागि बहालमा रहेका बर्तमान भारतीय राजदूत रञ्जीत रेको कार्यकाल समाप्त हुन केही समय मात्रै बाँकि हुँदा भारतले नयाँ राजदुत पठाउने तयारी थालेको हो ।
भारतले नेपालका लागि भारतीय सेनाका पूर्व प्रमुख दलबीर सिंहलाई राजदुतको रुपमा पठाउने तयारी थालेको भारतीय सञ्चारमाध्यमहरुले जनाएका छन् ।
भारत सरकारको निकट मानिने पत्रिका नवभारत टाइम्सका अनुसार नेपालमा बढेको चिनियाँ प्रभावलाई ‘कन्ट्रोल’ गर्न भारत सरकारले बहालवाला राजदूत रञ्जीत रेको ठाउँमा प्रभावशाली व्यक्ति पठाउने तयारी थालेको हो ।
सिंहले चिनियाँ प्रभाव कम गर्न सक्ने आँकलनसहित उनलाई नेपाल पठाउने तयारी सरकारले गरेको समाचारमा उल्लेख गरिएको छ ।
इतिहासमै पहिलोपटक नेपाल र चीनबीच आगामी फेबु्रअरीमा हुन लागेको संयुक्त सैन्य अभ्यासले तर्सिएर आपत्ति जनाएका भारतीयहरु नेपालमा चिनियाँ प्रभाव रोक्न र आफ्नो अस्तित्व रक्षा गर्न लागि परेका छन् । यसैक्रममा राजदूत पनि प्रभावशाली व्यक्ति पठाउने तयारी थालिएको हो ।
म्यानमार र पाकिस्तानमा सर्जिकल स्ट्राइक गरेसँगै सिंह र भारतीय प्रधानमन्त्री नरेन्द्र मोदीबीचको सम्बन्ध प्रगाढ रहेको भारतीय सञ्चारमाध्यमहरुले उल्लेख गरेका छन् ।
मोदी सरकारले नै उनलाई आर्मी चीफ बनाएको थियो । र मोदी सरकारले नै नेपालका लागि राजदुतको रुपमा पठाउने तयारी पनि थालेको छ ।
राजदुतका लागि नेपाल पठाईने भनिएका भारतीय सेनाका पूर्व प्रमुख दलबीर सिंहले एक साता अघि अर्थात डिसेम्बर ३१ मा मात्रै अवकाश सेना प्रमुखबाट पाएका थिए ।
यद्यपि नेपालका लागि भारतीय राजदुत हुने नहुनेमा सिंहले भने कुनै पनि प्रतिक्रिया दिएका छैनन् ।
प्रकाशित मिति: २० पुस २०७३, बुधबार
