कपिलवस्तुमा सर्पको टोकाइबाट एक युवतीको मृत्यु
बुटवल । कपिलवस्तुमा सर्पको टोकाइबाट युवतीको मृत्यु भएको छ । जिल्लाको कपिलवस्तु नगरपालिका–१ मालटोलस्थित १६ वर्षीया रिया बर्माको विषालु गोमन सर्पको टोकाइबाट मृत्यु भएको हो ।
बुधबार मध्यरातमा उनलाई घरमै विषालु सर्पले टोकेको थियो । त्यसलगत्तै उनलाई उपचारका लागि कपिलवस्तु अस्पताल पुर्याइएको थियो ।
त्यहाँ उपचार सम्भव नभएपछि थप उपचारको लागि सर्पदंश उपचार केन्द्र गोरुसिङ्गे लैजाँदै गर्दा उनको मृत्यु भएको जिल्ला प्रहरी कार्यालय कपिलवस्तुले जनाएको छ ।
उनले कपिलवस्तुको तौलेश्वरनाथ संस्कृत माध्यमिक विद्यालयबाट एसइई पास गरेकी थिइन् ।
प्रकाशित मिति: २१ जेष्ठ २०८३, बिहिबार
