राप्रपा अध्यक्षमा कमल थापा विजयी



काठमाडौं, फागुन ९

राष्ट्रिय प्रजातन्त्र पार्टीको अध्यक्षमा कमल थापा विजयी भएका छन्। उनले २ हजार ८ सय ४ मत ल्याएका छन्। राजधानीमा जारी एकता महाधिवेशनको चौथो दिन सोमबार भएको मतदानमा कूल ३ हजार १ सय ३६ मत खसेको थियो। यसमध्ये ८१ मत बदर भएको थियो भने अध्यक्षका प्रत्यासी प्रदीपविक्रम राणाले २ सय ५१ मत ल्याएका थिए।

तीन हजार दुई सय ८७ प्रतिनिधिमध्ये ३ हजार १ सय २६ जनाले मतदान गरेको राप्रपाले जनाएको छ। नेता प्रकाशचन्द्र लोहनीनिकट राणाले उम्मेदवारी दिएपछि थापालाई सर्वसम्मत अध्यक्ष बनाउने राप्रपाको प्रयास असफल भएको थियो। लोहनीले उम्मेदवारी घोषणा गरे पनि अन्तिम समयमा मैदान छाडेका थिए। ९८ सदस्यका लागि भने मंगलबार बिहानैदेखि निर्वाचन हुनेछ।

विद्युतीय प्रविधिबाट मतदान गर्ने भनिए पनि अन्तत मतपत्रकै प्रयोग भएको छ। सदस्यहरूका लागि हुने मतदान भने विद्युतीय भोटिङ मेसिनबाट गर्ने बताइएको छ। महाधिवेशनबाट पारित नयाँ विधानअनुसार एक सय ६३ केन्द्रीय सदस्यमध्ये ६० प्रतिशत अर्थात् ९८ सदस्य निर्वाचनबाट चुनिने राप्रपाका नेता मोहन श्रेष्ठले जानकारी दिए।

९८ सदस्यका लागि तीन सय ६३ को उम्मेदवारी परेको छ। बाँकी ४० प्रतिशत केन्द्रीय सदस्य मनोनित हुनेछन्। त्यस्तै नयाँ विधानअनुसार २७ जना पदाधिकारी मनोनित हुने छन्।

प्रतिक्रिया दिनुहोस्
           
सामाजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
संस्थापक / प्रधान सम्पादक : ध्रुब सुबेदी
     
           
facebook
© 2022 Deshko News