सिलिन्डर विस्फोट : ६ जनाको आइसीयुमा उपचार
काठमाडौँ । ग्याँस सिलिन्डर विस्फोटमा परेका ११ जनामध्ये ६ जनाको उपचार आइसीयुमा हुँदैछ । कीर्तिपुर अस्पतालमा उपचाररत घाइतेहरूमध्ये पाँच जनाको अवस्था सुधारजनक रहेको छ । उपचाररत घाइते सबैको अनुहारमा जलन भएको अस्पतालले जनाएको छ ।
अस्पतालका अनुसार हात, खुट्टा र छातीमा पनि जलन भएको छ । पाँच जना बोल्न सक्ने अवस्था रहे पनि सामान्य अवस्था हुन समय लाग्ने देखिएको अस्पतालले जनाएको छ ।
माघ २४ गते काठमाडौँको कमलपोखरीस्थित शानदार मःम पसलमा ग्याँस सिलिन्डर विस्फोट हुँदा ११ जना घाइते भएका थिए । केशव श्रेष्ठको घरमा सञ्चालनमा रहेको सानदार मःम सेन्टरमा अचानक ग्यास विस्फोट भएको थियो ।
घाइते हुने सबै पुरुष रहेको अस्पतालले जनाएको छ ।
प्रकाशित मिति: २७ माघ २०८१, आइतबार
