सरकारमै रहेको जस्तो व्यवहार देखाउने माथि मौलिक उपचार हुन्छ : गृहमन्त्री अर्याल
काठमाडौं । गृहमन्त्री ओमप्रकाश अर्यालले सरकारमा नभए पनि सरकारमै रहेको जस्तो व्यवहार देखाउने माथि मौलिक तरिकाको उपचार गर्ने बताएका छन् ।
सुदूरपश्चिम प्रदेशको पनि सरकारमा प्रतिनिधित्व हुनुपर्ने लगायतका माग राख्दै अनसन बस्दै आएका अछामका मदन बुढाको आज अनसन तोडाउँने क्रममा उनले यस्तो बताएका हुन् ।
उनले भने- ‘सरकारमा नभए पनि म त सरकारमै छु जस्तो, म नै राज्य हुँ जस्तो जुन खालको आइरहेको थियो त्यसको सरकारले अर्गानिक-वेमा ट्रिटमेन्ट गरिरहेको छ त्यो विकृत हो, त्यो रोग हो । हामी त्यसको ट्रिटमेन्ट अर्गानिक-वेमा गरिरहेका छौं ।’
उनले त्यस्तो विकृति हटाउन अंतरिम सरकार क्रियाशील रहेको बताएका छन् ।
उनले भने- ‘आइ एम द स्टेट भनेर कसरी भनेका रहेछन् । अहिले पनि के कारणले मानिसहरू बकबक गरिरहेका छन् अहिले पनि ? सरकारमा नभए पनि सेनामेना हेर्नुस् न कति जना लिएर हिँड्दा रहेछन् । एउटा मान्छेको पछाडि ५२ जना हुँदोरहेछ कतिपयको ४७ जना हुँदोरहेछ ।’
प्रकाशित मिति: २८ आश्विन २०८२, मंगलबार
