मकवानपुर-१ मा एमालेबाट ७ जना सिफारिस, निवर्तमान सांसददेखि गाउँपालिका अध्यक्षसम्म

मकवानपुर । आगामी प्रतिनिधि सभा निर्वाचनका लागि नेकपा (एमाले) मकवानपुर निर्वाचन क्षेत्र नम्बर १ ले सम्भावित उम्मेदवारहरूको नामावली सिफारिस गरेको छ। निर्वाचन क्षेत्रीय कमिटीको बैठकले सो क्षेत्रबाट चुनाव लड्न सात जना नेताको नाम माथिल्लो कमिटीमा पठाउने निर्णय गरेको हो।

सिफारिसमा यसअघि चार पटकसम्म निर्वाचन जितेका कृष्णप्रसाद दाहालदेखि बहालवाला प्रदेश सांसद र गाउँपालिका अध्यक्षसम्म समेटिएका छन्। सिफारिस गरिएका नामहरूमा एमाले केन्द्रीय सदस्यद्वय रामेश्वर राना र एकालाल श्रेष्ठ रहेका छन्। श्रेष्ठ हाल बागमती प्रदेशसभा सदस्य हुन्।

यस्तै, एमाले मकवानपुरका उपाध्यक्ष तथा भीमफेदी गाउँपालिकाका अध्यक्ष हिदम लामाको नाम पनि उम्मेदवारका रूपमा सिफारिस भएको छ। पूर्व राष्ट्रिय सभा सदस्य रामचन्द्र राई, मदनकुमार दाहाल र नारायण सापकोटा पनि आकांक्षीका रूपमा सिफारिसमा परेका छन्।

आगामी फागुन २१ मा हुने निर्वाचनका लागि राप्रपाबाट दीपक बहादुर सिंह एकल सिफारिस भइसकेका छन् भने कांग्रेसबाट महालक्ष्मी उपाध्याय ‘डिना’ सहित तीन जनाको नाम चर्चामा छ।