धनुषा घटनाको असर पर्सासम्म: ५ राउण्ड अश्रुग्यास प्रहार, मधेशभर बढाइयो सुरक्षा सतर्कता
पर्सा । टिकटकमा एकअर्काको धर्मलाई लिएर अभद्र टिप्पणी गरेको विषयलाई लिएर मधेश प्रदेशमा तनाव बढेको छ ।
केही दिन अगाडि जनकपुरमा हैदर अन्सारी र अमानत अन्सारी नामका युवाहरुले टिकटकमा हिन्दुस्तानको नाम लिँदै एक भिडियो पोष्ट गरेका थिए । सुरुमा दुई जना मुस्लिम युवकले हिन्दु समुदायको रक्षाबन्धन पर्वप्रति नकारात्मक सन्देश जाने भिडियो सामाजिक सञ्जालमा पोस्ट गरेका थिए।
धार्मिक सहिष्णुतामा खलल पुग्ने खालको भिडियो बनाइएको भन्दै ती दुई युवालाई स्थानीय अगुवाहरुले प्रहरीको जिम्मा लगाएका थिए ।
उक्त भिडियो बाहिरिएपछि आक्रोशित स्थानीय युवाहरूले कमला नगरपालिका–६, सखुवा मरानस्थित मुस्लिम टोलको मस्जिदमा शनिबार तोडफोड र धार्मिक ग्रन्थ जलाइएको थियो। युवाहरूले दोषीमाथि कारबाहीको माग गर्दै प्रहरी चौकी घेराउ गरेका थिए।
धनुषामा भएको सोही घटनालाई लिएर वीरगञ्जमा पनि आज बिहानैदेखि प्रदर्शन भइरहेको थियो।
प्रदर्शन उग्र बनेपछि प्रहरीले ५ राउण्ड अश्रुग्यास प्रहार गरेको छ। प्रदर्शनकारीले प्रहरीमाथि ढुङ्गामुढा गर्नुका साथै छपकैया प्रहरी बिटमा तोडफोड गरेपछि स्थिति तनावपूर्ण बनेको थियो।
भीडलाई तितरबितर पार्न र स्थिति नियन्त्रणमा लिन प्रहरीले जवाफी कारबाही गरेको हो।
अहिले सुरक्षा संवेदनशीलका मधेशका आठैवटा जिल्लामा सुरक्षा सतर्कता बढाइएको छ।
प्रकाशित मिति: २० पुस २०८२, आइतबार
