निर्वाचन आयोगले दियाे कांग्रेसकाे गगन-विश्व समूहलाई मान्यता

काठमाडौं । निर्वाचन आयोगले नेपाली कांग्रेसको गगन कुमार थापा नेतृत्वको कार्यसमितिलाई मान्यता दिने निर्णय गरेको छ।

शुक्रबार बसेको आयोगको बैठकले चार तारे झन्डा र चुनाव चिन्ह रुखसहित गगन थापाले नेतृत्व गरेको कार्यसमितिलाई आधिकारिक कांग्रेसको मान्यता दिने निर्णय गरेको हो।

आयोगले मान्यता दिएसँगै गगन थापा आधिकारिक रूपमा नेपाली कांग्रेसको सभापति भएका छन्।

तत्कालीन दुई महामन्त्री गगनकुमार थापा र विश्वप्रका शर्माको अगुवाईमा पुस २७ देखि ३० गतेसम्म भृकुटीमण्डपमा विशेष महाधिवेशन आयोजना भएको थियो। विशेष महाधिवेशनले गगन थापाको नेतृत्वमा नयाँ कार्यसमिति चयन गरेको थियो।

विशेष महाधिवेशनबाट उपसभापतिमा विश्वप्रकाश शर्मा र पुष्पा भुसाल, महामन्त्रीमा प्रदीप पौडेल र गुरु घिमिरे, सहमहामन्त्रीमा महिलाबाट डा. डिला संग्रौला पन्त, दलितबाट प्रकाश रसाइली, आदिवासीजनजातिबाट बहादुर सिंह लामा, खसआर्यबाट उदय शम्शेर राणा, मधेसीबाट मुक्ताकुमारी यादव, मुस्लिमबाट फर्मुल्ला मन्सुर, थारूबाट योगेन्द्र चौधरी र पिछडिएको क्षेत्रबाट कर्णबहादुर बुढा चयन भएका थिए।

कांग्रेस संस्थापन पक्षले विधान विपरीत कार्य गरेको भन्दै महामन्त्रीद्वय थापा, शर्मा र सहमहामन्त्रसी मन्सुरलाई कारबाही गरेको थियो।

विशेष महाधिवेशनबाट नयाँ नेतृत्व चयन भएपछि गगन थापाको समूह निर्वाचन आयोगमा अद्यावधिकका लागि निवेदन दिएको थियो।

त्यसविरुद्ध संस्थापन पक्षले ८ सय ८५ जनाले हस्ताक्षर फिर्ता लिएको निवेदन दिएको थियो।