मोदीले जेनजीलाई सम्बोधन गरेको भिडियो फेसबुकले ब्लक गरेपछि…

नयाँ दिल्ली । भारती प्रधानमन्त्री नरेन्द्र मोदीले जेनजीलाई सम्बोधन गरेको फेसबुक भिडियो भारतमा केही घण्टासम्म हेर्न नमिल्ने भएपछि विवाद उत्पन्न भएको छ ।

फेसबुकको माउ कम्पनी मेटाले प्राविधिक त्रुटिका कारण यो समस्या भएको स्वीकार गर्दै माफी मागेको छ । सुरुमा उक्त भिडियोमा ‘कानुनी अनुरोधका कारण यो सामग्री तपाईंको क्षेत्रमा उपलब्ध छैन’ भन्ने सन्देश देखिएको थियो । यसले भिडियो कुनै सरकारी आदेश वा कानुनी निर्देशनका आधारमा रोकिएको हो कि भन्ने आशंका उत्पन्न गरेको थियो । तर केही घण्टापछि भिडियो पुनः सामान्य रूपमा उपलब्ध गराइयो ।

मेटाका अनुसार भिडियो जानाजानी हटाइएको वा ब्लक गरिएको थिएन । कम्पनीले यसलाई प्राविधिक गडबडीको परिणाम भनेको छ । भिडियो अहिले पनि फेसबुकमा उपलब्ध रहेको र सबै प्रयोगकर्ताले हेर्न सक्ने कम्पनीले स्पष्ट पारेको छ । यस घटनापछि भारतको सत्तारुढ भारतीय जनता पार्टी (भाजपा)ले मेटामाथि प्रश्न उठाएको छ । पार्टीकी प्रवक्ता प्रीति गान्धीले सामाजिक सञ्जालमार्फत भारतका नागरिकले के हेर्ने वा नहेर्ने भन्ने निर्णय गर्ने अधिकार मेटालाई कसले दिएको भन्दै आलोचना गरेकी छिन् ।

यस विषयलाई भारत सरकारले पनि गम्भीर रूपमा लिएको बताइएको छ । समाचारअनुसार सरकारले मेटाका अधिकारीलाई स्पष्टीकरणका लागि बोलाउन सक्ने सम्भावना रहेको छ ।