पोखरा, जेठ २७

नेपाल उद्योग वाणिज्य महासङ्घका पूर्वअध्यक्ष चण्डिराज ढकालले देशका सातवटै प्रदेशमा स्थापना भएका उद्योग वाणिज्य महासङ्घ आर्थिक रुपमा सशक्त हुने बताउनुभएको छ ।

नेपाल उद्योग वाणिज्य महासङ्घ प्रदेश नं – ४ को प्रथम सभाको आज यहाँ उद्घाटन गर्दै उहाँले केन्द्रको आम्दानीमध्येको ४० प्रतिशत प्रदेश उद्योग वाणिज्य महासङ्घका लागि छुट्टाइने जानकारी दिनुभयो ।

पूर्वअध्यक्ष ढकालले स्थानीय तहका निर्वाचित पदाधिकारीसँग सहकार्य गरेर स्रोत र साधनको अधिकतम परिचालनबाट मुलुकलाई आर्थिक समृद्धितर्पm अग्रसर गराउन महासङ्घले महत्वपूर्ण भूमिका खेल्नुपर्नेमा जोड दिनुभयो ।

महासङ्घ प्रदेश नं– ४ तदर्थ समितिका संयोजक सञ्जीवबहादुर कोइरालाको अध्यक्षतामा भएको सो कार्यक्रममा महासङ्घका केन्द्रिय सदस्य दीपक लम्साल, निर्माणकुमार श्रेष्ठ, ध्रुव भारी, म्याग्दी उद्योग वाणिज्य महासङ्घका अध्यक्ष जीवन विश्वकर्मा र सहायक प्रमुख जिल्ला अधिकारी झलकराम सुवेदीलगायतले मुलुकको आर्थिक समृद्धि सबैको साझा दायित्व भएको बताउनुभयो ।

प्रदेश नं– ४ को नेतृत्वसमेत चयन गर्ने गरी आयोजना गरिएको सो सभामा यस प्रदेश अन्तर्गतका १७ जिल्ला तथा नगर उद्योग वाणिज्य सङ्घका अध्यक्ष र प्रतिनिधिको सहभागिता छ ।

प्रकाशित मिति: २७ जेष्ठ २०७४, शनिबार