प्रशंसकसँग महानायक हमालकाे आग्रह : दीपाश्रीलाई ‘क्षमा’ गरिदिनू



काठमाडौँ, असार ३१
अभिनेत्री दीपाश्री निरौलालाई ‘क्षमा’ गरिदिन आफ्ना प्रशंसकसँग महानायक राजेश हमालले आग्रह गरेका छन् । हमालले मंगलवार राती सामाजिक सञ्जाल फेसबुकमा एक भिडियो पोस्ट गर्दै दिपाश्री निरौलालाई क्षमा गरिदिन दर्शक तथा स्रोतासँग अनुरोध गरेका छन्।

‘यो कला क्षेत्र जहाँ हामी विभिन्न कलाकार संलग्न छौं यो क्षेत्र मेरो र अन्य कलाकारहरुको मात्र होइन । यो राष्ट्रको कला क्षेत्र तपाईंहरुको पनि हो । भलै मैदानमा हामी उत्रन्छौं, मैदानमा हामी मिहिनेत गर्छौं । तर त्यसको पछाडि ऊर्जा त हामीलाई तपाईंहरुबाटै मिल्छ,’ उनले भनेका छन्, ‘त्यसकारण तपाईंहरुको भूमिकामा सदैव हाम्रो सिर्जनामा हाम्रो कलामा अत्यन्तै ठूलो भूमिका खेलेको हुन्छ । त्यसैले पनि म यहाँहरुलाई यो अनुरोध गर्न चाहन्छु कि यो राष्ट्रको कला क्षेत्रका र मानवताका लागि अत्यन्तै सकारात्मक भएर कृपया सम्बन्धित व्यक्तिलाई क्षमा दिनुहोला ।’

दिपाश्रीले एक अन्तर्वार्तामा राजेश हमाल महानायक हो र? भन्दै प्रश्न उठाएपछि उनको चर्को आलोचना भइरहेको छ। दर्शकमात्रै होइन पुराना कलाकारहरु पनि राजेश हमालको पक्षमा उत्रिँदै दिपाश्रीको कडा आलोचना गरिरहेका छन्। यो प्रकरणमा दिपकराज गिरी पनि निशानामा परेका छन्।

विवाद साम्य हुने भन्दा पनि दिन प्रतिदिन बढ्दै गएपछि राजेशले फेसबुकमार्फत कला क्षेत्रमा पछिल्लो समय सिर्जना भएको विवादले आफूलाई दु:ख लागेको उल्लेख गरेका छन्।

उनले कलाकार र दर्शकबीच नङ र मासुको सम्बन्ध रहेको भन्दै एउटा कलाकारले बोल्दा गरेको गल्तीलाई माफी दिन उनले फ्यानसँग अनुरोध गरेका हुन्।

आफूलाई चित्त नबुझेको, भावनालाई ठेस पुर्‍याउने कुरा कसैले गर्छ भने त्यसमा ठाडो प्रतिक्रिया आउनु एक हिसाबले स्वभाविक भए पनि मानवतामा आँच, आघात र चोट लाग्ने गरी गाली गर्नु सही नहुने उनको तर्क छ।

हमालले यस्ता अभिव्यक्तिलाई नजरअन्दाज गरेर आफ्नो काममा अगाडि बढ्ने सहिष्णुता आफूमा भएको स्पष्ट पार्दै सहिष्णुता दर्शक जनसमुदायले दिएको उर्जाबाट प्राप्त भएको उल्लेख गरे।

‘त्यसैले म आफ्नो दर्शक, जनसमुदायलाई हृदयदेखि अनुरोध गर्न चाहन्छु केही फराकिलो भएर बृहत चित्रलाई मनन गरेर अत्यन्त सकारात्मक हिसाबबाट मानवताका लागि र कसैको मानवतामा आँच नपुग्नेगरी आफ्ना अभिव्यक्ति प्रकट गरौं,’ उनले भनेका छन्।

दर्शक र कलाकारको सम्बन्ध नङ र मासुको जस्तै रहेको भन्दै उनले दर्शकले दिने प्रतिक्रियाहरुले कलाकारलाई परिमार्जित र परिस्कृत हुनका लागि प्रेरणा दिने उनले बताए ।

 

प्रतिक्रिया दिनुहोस्
सामजिक संजालमा हामी
सूचना विभाग, दर्ता प्रमाणपत्र नं. ३८६/०७३-७४
सम्पर्क
देशको मिडिया प्रा.लि. काठमाडौँ, नेपाल
इमेलः [email protected]
फोन : ०१-४१०७६६६
           
सम्पादक : अंकुश कुँवर
     
           
facebook
© 2020 Deshko News